في المقال دا هنكلمكم عن زيت فوايده كبيرة جدًا للشعر والبشرة، وهو زيت الجوجوبا.
زيت الجوجوبا هو الزيت الوحيد اللي بيشبه الهيكل الجزئي للزيت الطبيعي اللي بتنتجه البشرة وفروة الراس، عشان كدا بيمتلك فاعلية عالية في تحسين الشعر والبشرة بشكل ملحوظ.
وبشكل عام فالجوجوبا بيصلح مرطب للجسم، وبديل طبيعي وآمن للبادي لوشن، زي كمان ما ممكن نستخدمه كحمام زيت للشعر التالف، بجانب إنه معطّر جميل ويصلح لتصفيف الشعر.
فوائد زيت الجوجوبا للشعر:
– بيزيد من كثافة الشعر وسُمك الشعراية
– بتتقبله الفروة بشكل سريع ومش بيسبب أي خلل في فروة الراس
– له خصائص مضادة للجراثيم، عشان كدا بيساعد على تهدئة فروة الراس، ويمكن استخدامه لعلاج مشاكل جفاف الفروة وقشرة الراس
– زيت الجوجوبا بيتكون من 98% من الدهون غير المشبعة، و2% من الدهون المشبعة؛ ودا بيمكّنه من إختراق بصيلات الشعر وتقوية الألياف من الداخل
– بجانب إنه بيرطب الشعر من الداخل
– بيزيد من نعومة الشعر ومرونته وتألقه
– فعّال جدًا فى علاج القشرة وتنظيم الإفرازات الدهنية لفروة الراس
فوائد زيت الجوجوبا للبشرة:
– زيت الجوجوبا بيوفر ترطيب عميق للبشرة لإحتوائه على كولاجين طبيعي
– بيغذى البشرة، ودا لأنه مليان بالمغذيات زي فيتامينB,E ، فضلًا عن احتوائه على المواد المضادة للأكسدة، زي برضه ما بيحتوي على نسبة عالية من معدن الزنك اللي بيغذي وبيحمى الجلد
– بيكافح الشيخوخة وبيساعد على تلاشي الخطوط الدقيقة والتجاعيد
– بيحافظ على توازن زيوت البشرة بدون تشجيع ظهور حَب الشباب
– لطيف على البشرة وممتاز لأصحاب البشرة الحساسة.. خصوصًا البشرة المصابة بالصدفية والإكزيما
– بيساعد على تخفيف حروق الشمس
زيت الجوجوبا كمان له فوايد كبيرة للهالات السودا، ودا لأن تركيبته بتشبه الزيت اللي بتنتجه البشرة، وبالتالي مش بيسبب أي إنسداد للمسام أو ترك أي ترسبات وآثار دهنية على البشرة، دا بجانب إنه بيخفف من ظهور التجاعيد والهالات السودا بشكل فعّال جدًا، خصوصًا لو تم استخدامه بشكل يومى.
بالتوفيق